夏日炎炎除咗正好眠，其實好多人都鍾意去swim，而九龍公園嘅游泳池，相信都帶畀唔少港人歡樂時光，但最近康文署竟然有個超騎呢舉動，喺橋底加咗圍欄分隔泳池，惹怒一眾「九公」嘅嬉水常客，細細個喺「九公」做過柱男嘅公民黨黨魁楊岳橋，就話官員除咗要有常識，同時要有美學修養！
話說九龍公園室外泳池（一號嬉水池）本月中重開前，康文署竟然喺泳池中間嘅行人天橋底加咗兩排金屬圍欄，將泳池一劏二，原因係橋底嘅柱躉令救生員有視覺盲點，仲曾經有細路哥喺橋下遇溺，但唔少泳客都質疑矯枉過正，不滿長度同面積縮減後冇埋原有特色。
岳少喺facebook以泳客身份發表意見，「喂我細細個都喺九龍公園游水，橋底嬉水係泳池一大特色，從來冇想像過政府會如此笨拙地喺橋底加圍欄」。
提議改救生員位置更方便
佢話如果橋躉阻礙救生員嘅視線，係咪應該改動救生員嘅位置，而唔係斬腳趾避沙蟲咁加裝圍欄呢？仲hashtag「醒少少好冇」、「加圍欄貴啲定救生員坐啱位貴啲」、「多此一舉」。
八方問過岳少，佢最記得細個放暑假，啲長輩會帶住佢同表弟妹、一齊去九龍公園泳池放電，「成個晏晝就喺度瘋狂咁玩，大家游嚟游去，有時又攬吓條柱」，那些年快活時光好易過，橋躉相信係唔少人嘅回憶。佢話若然救生員喺現場有盲點，何不試吓改改救生員坐嘅位置，覺得呢啲都係常識，同埋希望官員有啲美學修養。又係嘅，泳池突然有個欄，都幾肉酸吓㗎！
李八方