神話破滅股利豐（494），過去6年股價由高位20蚊樓上，跌到今時今日僅徘徊3.3元水平，潛水幅度高達80%，仲揸住嘅苦主真係一殼眼淚。近月有小股民就係網上論壇搞咗個「利豐494從（重）振雄風打氣區」，想話為利豐「給力」，只可惜無論點打氣，又逐一對負皮留言反擊，都「重振」唔到利豐嘅「雄風」。
個「打氣區」今年2月喺香港討論區發佈，內文提到𠵱家利豐已回到2003年的「沙士價」，已經「衰無可衰、衰到貼地」，係入市好時機，當中有人就以6大要點分析利豐股價，深信有機會係3月急升，仲話可以坐定定等收息。可惜利豐唔爭氣，上個月公佈去年業績，遠差過市場預期，派息又少左，搞到翌日仲要急瀉一成。
其實利豐當年好巴閉，2011年曾經高見21蚊，不過公司以往作為中間人、買辦角色，隨時代及科技進步已逐漸式微，加上利豐早年胡亂收購，令公司消化不良，拖累業績表現，今年初仲被剔出藍籌。要「重振雄風」，似乎要大規模重組先有機。