玩潑水節使乜去泰國，去有「小泰國」之稱嘅九龍城仲好玩啦！一年一度嘅九龍城潑水節噚日上演，逾百名大人細路齊集城南道街頭，攞起水槍瘋狂掃射，亦有人拎住水桶大潑特潑，唔使幾分鐘，人人由頭濕到落腳。近日天氣轉熱，九龍城噚日最高29℃，互相潑水涼一涼，參加者都大讚非常好玩。
潑水節現場除咗水戰，仲有仙女巡遊，着上泰國傳統服飾嘅200人巡遊隊伍，浩浩蕩蕩由賈炳達道公園出發，巡遊九龍城，非常吸睛。賈炳達道公園亦有嘉年華會，有傳統泰國舞蹈、泰國拳王表演等活動。介紹番，潑水節係泰國人嘅過年節慶，潑水可以清洗衰氣帶嚟好運，亦代表真誠嘅祝福，潑得越多就越好。