世事往往一不離二！今午（9日）第三場由全場僅有的一對新勝馬串Q，估唔到隔半粒鐘後第四班三班草地1200米，又係全場唯一一pair新勝馬包辦連贏位，頭馬是巫顯東策騎，徐雨石馬房的「獅子驄」，單Win及組合獨贏A1分別派22及18元。
「獅子驄」上次由巫顯東贏四班田草1200米開齋，今仗由同一見習騎師跑同程，但升高一個班次，結果呢匹新勝馬藉輕磅之利放到，險勝短馬頭位，大熱連捷；連贏搭同場另一新勝馬，復由雷神壓陣的次熱門「開心遊戲」，就此開出整日第二條新勝馬連贏，Ｑ只派43元。
「獅子驄」幕後今場識計數，用番巫顯東減十磅，抵銷上次贏馬所加十分，就此一放到底，正如網民所講，如果巫顯東受讓少過十磅，分分鐘捱唔到終點而俾雷神建功。而巫顯東季內已獲6Win，其中4場是擊敗雷神座騎贏馬，出奇地成為雷神剋星。
徐雨石說：「今場贏得好辛苦，末段成堆馬衝前想湧過『獅子驄』，若非有巫顯東減十磅，恐怕已失去這場頭馬。」一匹見習騎師賽駒獨贏熱到僅得2.2倍，各方信心亦可謂大到無倫，賽果則令人抹一把汗！
第四場二至四名分別為「開心遊戲」、「金剛之星」及「靚猴王」，四重彩派1,023元。