復活節假期就到，除咗留港遊山玩水外，亦可考慮捐血救人，皆因每逢節日，外遊人數增加，捐血人數都驟減，需要更多有心人，復活節去捐血仲可獲紅十字會Blood Buddy磁貼小白板。但要留意，有時有心捐，都未必得，好似舊年就有逾7萬人被紅十字會暫緩捐血，較前年增加15.8%，而過去幾年嘅暫緩捐血人數都佔捐血總人數兩成，其中血紅素不足個案佔近13%。
唔夠血紅素，可能因為飲得太多咖啡同奶茶，皆因咖啡同奶茶含單寧酸，會影響身體吸收鐵質，未符捐血要求，平日食多啲牛肉、菠菜、黑木耳等都有助吸收鐵質，確保血紅素充足。
有心男捐血204次
其實捐血中心每日最少要1,100人捐血先至應付到醫療需求，1993年首次捐血、至今捐血204次嘅余偉堅就係極有心人士，平均每年捐血超過8次，佢話首次捐血係被尖沙嘴捐血站一張海報上字眼「石中能取血，何需向君求」打動，之後仲登記捐骨髓，救咗一個患重型地中海貧血嘅小女孩，其後仲成為「成份血捐贈者」，冀幫到更多人。