現年55歲嘅歐瑞偉係龍虎武師出身，86年讀完無綫藝員進修班畢業後，一直做到今時今日，先後拍過100套劇集，除咗剛播完嘅《與諜同謀》之外，喺處境劇《愛．回家》演賤精律師KC，令人印象深刻。
問妻意見
入行多年，歐瑞偉作風極度低調，幾乎零是非零緋聞，係圈中數一數二嘅好好先生，而外形硬朗嘅佢，原來亦係好老公。日前就見到佢孖住結婚18年嘅老婆喺尖沙嘴行街，兩公婆仲手拖手好恩愛。
當日所見，歐瑞偉同老婆沿海防道一直行，主攻錶行同金舖，兩公婆尤其對手錶最有興趣，一直研究。見佢哋停喺錶行外面嘅櫥窗，歐瑞偉同老婆講想買啲成熟同簡約設計嘅款式，歐太就幫眼同畀意見，兩個人對住櫥窗手指指密密斟。
擾攘一輪之後，歐瑞偉最後都冇入去錶行，但見佢連自己要買隻錶，都會問清楚老婆意見。之後兩公婆繼續手拖手行去海運中心方向，結婚18年都仲好似拍緊拖咁，真係令人羨慕。
撰文：馮仁昭
