香港首位女特首林鄭月娥，究竟會搵邊一個做下屆教育局局長？似乎仲未有明確人選，只知肯肯定唔係現任嘅吳克儉，事關佢話明7.1離任。而喺大家猜猜猜之際，自由黨黨魁鍾國斌日前突然話推薦黨主席張宇人做教育局局長，認為對方「好熟」教育係適當人選，呢個建議不單令政界中人詫異，似乎亦令自由黨榮譽主席田北俊好震驚，忍唔住又抽水一番。
田少喺facebook留言指，「同張宇人做咗咁多年同事，我緊係會向林鄭大力推薦張宇人做教育局局長」，單睇呢句似乎曲到圓，所以佢之後hashtag「忍唔住偷笑」、「諗到呢條橋嘅人真係一個天才」、「保證一定好過唔得掂」、「三十幾萬一個月又可以成日公幹」及「正過做議員」等等，是讚是彈，大家心中有數啦！