雖然唔係候任特首林鄭月娥嘅新班子人選，但財政司司長陳茂波似乎冇因為出局在即而hea住做，反而舉動頻頻，莫非想靠勤奮嚟個大翻身？好似噚日咁，佢一早就出席培幼會舉行嘅「『愛．女孩』起跑！」慈善跑步籌款活動做主禮。
查實波叔同培幼會好有淵源，細細個住木屋區嘅佢曾經受助於國際培幼會，獲一位美國人助養，身為前受助人嘅波叔話好感激助養者嘅幫助，令佢生活得到改善，至今仲同助養者保持聯絡㗎。
佢噚日同一眾嘉賓齊齊翻轉手持嘅圖案板，展示hashtags「#RunforGirlsRights」、「#同為女孩加油」，為活動揭開序幕，嘉賓同時舉起右手，象徵支持「愛．女孩」活動同女童權益，波叔其後仲帶領嘉賓前往起跑線，為3公里比賽鳴槍。