候任特首林鄭月娥密鑼緊鼓組班，唔少撐佢上位嘅政黨政團梗係想有餅仔分，紛紛向林鄭推薦黨員加入新政府班子，好似民建聯同自由黨咁，先後打咗開口牌話有人才可以推介。
全黨瞓身撐奶媽嘅經民聯亦唔執輸，佢哋嘅立法會議員梁美芬噚日出席活動時透露，經民聯有喺內部討論，會唔會有適合嘅成員喺不同崗位上，有機會參與政府事務。佢強調一切要係睇成員嘅專長同崗位啱唔啱，可能最後會交名單畀林鄭，但稍後先可以透露詳情，𠵱家仲未決定係咪推薦現任議員或其他人選嘅。
咁，佢個名會唔會喺推薦名單之內？梁美芬只強調一切仲喺商討階段，要視乎喺培訓人才、了解政府運作上，邊啲成員可以考慮推薦。佢話林鄭有諮詢佢哋意見，會等林鄭返港後再商討。