七欖看台除咗有唔同地方嚟，著到古靈精怪嘅球迷之外，最引人注目嘅，應該都係喺度賣汽水啤酒嘅靚女喇。賣汽水嘅Faye係大學生，已經係第二年嚟七欖做兼職，仲話好開心，因為現場氣氛好好喎。不過咪以為行行企企好輕鬆，一個冰筒裝住十幾支汽水，加埋個筒，女仔人家揹住成日，喺看台行上行落，都咪話唔辛苦。
而Cherry就係同幾個朋友一齊負責賣啤酒，原來佢地要自己畀錢，買壺啤酒去看台賣，再賺差價同埋「貼士」，每賣一壺兩公升賺到十蚊左右。Cherry上年都有嚟，做咗三日，加埋底薪搵到6,000幾蚊。不過都係一樣啦，抬住幾壺啤酒鬼咁重，腰酸背痛做完仲要貼止痛貼，真係辛苦錢。大家見到佢地，口唔口渴都要幫襯下啦係咪先？