大專生Cherry（右）第二年喺七欖賣啤酒，每壺要自己先畀錢，再賺差價同貼士，每賣一壺兩公升賺到10蚊。上年Cherry做三日加埋底薪賺6,000幾蚊。不過抬住幾壺啤酒咁重，搞到腰酸背痛，放工後要貼止痛貼，真係辛苦錢。
特製侏羅紀廁所
呢位首次嚟香港嘅澳洲人（左），三個幾月前已喺布里斯班叫人做呢套恐龍裝，唔知去廁所麻唔麻煩呢？佢話：「直接喺恐龍裝入面解決！」仲話澳洲都有七欖賽，但香港呢個搞到好似party咁，好玩好多。
斐濟炸爆北看台
北看台有斐濟球迷團體Blue Wiggers（藍色假髮團、圖）撐場，呢50位爆炸頭係住世界各地嘅斐濟人，今年來港10周年。創辦人之一Naomi話，佢哋去晒七欖系列賽咁多站，香港係最重要，因為氣氛最好！
