【本報訊】特首選舉塵埃落定，時代負責向前走，影像專注於停留。前財政司司長曾俊華的競選工作極為成功，用盡新媒體優勢，鏡頭下的「薯片叔叔」獲不少港人大讚真誠。幕後功臣攝影團隊「ATUM Images」經常獲讚「神級攝影」，拍下的一切是政治化妝或真情流露？就由攝影師親身剖白。
記者：黃翠儀
今年1月19日曾俊華宣佈參選，ATUM的工作亦正式展開，參與拍攝的成員有郭浩忠（Billy）、關學津（Anthony）、林亦非（阿非）、羅國輝和吳煒豪，在67日間「stand by」。
阿非多次強調，全程是紀實而非新聞攝影或單純商業攝影，兩個多月來除個人硬照，每一張照片均不經刪剪、鋪排，「好多人問我哋成個競選過程有冇預先去睇場、度位？我哋完全唔做呢啲嘢，憑反應觀察」，而且群眾反應難以預計，他笑言︰「我哋唔會預先10個鐘去等。」
「佢有能力當攝影師透明」
接下工作前，Billy坦言成員間曾有猶豫，「作為攝影記者，對於競選活動可能角色係有衝突」，令攝影師們有信心的最大關鍵，阿非回想是未合作前和競選辦開會，有廣告公司成員建議「擺大字」，有年輕成員憂慮指：「一個建制政治人物，你落區去擺呢啲嘢，會唔會引人示威、拆咗你個字呀？」但資深的前政務官反而表示：「如果落區唔係聽巿民心聲，乜嘢都怕，做乜要落區？」競選辦態度令人眼前一亮，「你好難想像一個喺政府出嚟嘅人，或者大家呢幾年政府官員印象，原來可以咁開放、咁願意聽人哋聲音」。
信任、溝通說來抽象，還是要靠行動說服一眾年輕人。阿非形容曾俊華很聰明並相信專業，「佢有能力當攝影師透明」。某次在攝影棚拍照作人形紙牌用，曾早上已跑了4個行程，而且中午預留一個小時拍照後尚有一堆工作，但完成拍攝後卻未有趕去休息或用膳，「佢反而留低同我哋討論香港嘅攝影界、影樓、商攝前途、生意狀況，又講佢當年喺美國讀大學，佢都有影相會自己沖菲林」。
鏡頭以外，攝影師總會看得更清晰，「佢畀你睇到其實佢真係願意用自己嘅時間，尤其係當佢喺一個好忙好辛苦嘅競選時刻，同人去交流同人去溝通」，候選人的一言一行令他們覺得，「嗰啲唔係口號嚟囉，佢真係去表現到出嚟」，亦正正解釋為何整個團隊比其他團隊形象更齊心及更有信念。
對攝影師而言，這段日子絕對屬於近年的歷史時刻。阿非舉例巴士巡遊當日來到時代廣場一站，他站在遠方天台上拍攝，曾俊華上車時被巿民包圍，便停在車門前向巿民揮手，「呢個場面喺香港好耐好耐冇見過，我有印象咁嘅場面，（最近期）可能係我喺緬甸影昂山素姬軟禁獲釋之後參加公眾場合」。他指香港回歸後「有邊一個政治人物無論咩黨派主張都好，佢出去會有咁多人圍住佢，想同佢影相握手？個反應係咁好其實真係好耐冇見過」。
「有追求係改變嘅開始」
美夢最終無成真，會否留下遺憾？ 阿非認為選舉會為之後的香港帶來影響，而對他自己和香港人來說，對一個特首候選人、對選舉工程的期望，「其實同之前已經完全唔同晒」，要令歷史出現轉捩點，無論哪一代的人都不能缺乏想像，「最重要係有人因為今次發夢而有追求……當一啲人對事情有渴望有追求，就係改變嘅開始」。
想像一個不同的未來，似在提醒香港人，夢醒，但故事未完。