噚日三場港超聯都有啲話題性，首先頭場富力對標準灝天和0:0，隨即令到包尾嘅港會宣佈降班。中間場就有南華半場落後0:4，最終輸畀和富大埔1:4；至於尾場嘅東方龍獅驚險逼和理文流浪3:3，𠵱家領先傑志四分但多踢一場，領先幅度收窄，衞冕聯賽有暗湧。
榜首東方龍獅噚晚喺青衣運動場上演嘅港超聯，補時階段逼和有佐迪連中三元嘅理文流浪。東方喺515名球迷面前對住輕裝上陣嘅流浪，表現失準，開賽七分鐘就被佐迪射破大門，不過，半場前東方把握流浪防守唔集中，由迪高及米曹各建一功，反先2:1完半場。流浪下半場未有放棄，射手佐迪52分鐘及63分鐘禁區內建功，反先3:2。落後嘅東方尾段靠後備上陣嘅麥基喺補時五分鐘左路傳遠柱，基奧雲尼後上頭槌頂入成3:3完場。東方失分，但仍以18戰46分居首，領先少賽一場嘅傑志四分。東方教練陳婉婷賽後話球隊入局慢，而且防守不穩。但佢哋唔使全失三分，總算不幸中之大幸。
擁南躉半場輸0:4走人
至於喺旺角場上演嘅南華對和富大埔亦充滿「驚喜」！南華對住大埔竟然半場連失四球，搞到有啲擁南躉完半場已經離場。南華今季表現差就冇得駁㗎啦，但喺約1,200名熱情球迷面前半場失四球，就確實幾難睇，而大埔下半場有啲收油，南華結果由高美斯破蛋，以1:4輸畀大埔。南華教練狄恩就梗係唔滿意，話球員犯埋呢啲個人錯誤，真係神仙難救。
噚日一口氣踢完三場港超聯後，今日五點半仲有本周最後一場，由九巴元朗主場對香港飛馬嘅中游戰，門票只收60同20蚊（學生及長者），球迷記得捧場。