日本賓架H來港考察香港最新政治經濟情況，即係香港所謂「收風」；賓架H富於國際經驗，長期駐外地，亞太區人脈關係網絡甚廣，據肥仔K講，日本行政人員若長期駐外，雖然（若順順利利的話）一生際遇不錯，可享受富裕生活，但好難回國升上到社長/取締役嘅職位，因為權力基礎來自國內總部，長期駐外人員總是吃虧一點。不過，退休之後，賓架H呢類行政人員因為有國際知識及網絡，往往會被延聘為一啲國際性機構/金融集團嘅國際顧問，做到七十幾歲都唔奇。
賓架H就係一間金控集團嘅顧問，集團在香港有分行，業務情報唔駛佢理，只係來港行個圈，聽聽香港與中國之最新宏觀風向而已。由新亞大師兄日本通C君安排，大家在馬會吃飯，談得好不輕鬆，佢問左丁山特首選舉情況，曾俊華點解會係外國勢力代表（呢一點左丁山都唔知點答）以及林鄭月娥與梁振英有何異同等等。呢啲嘢講得多都悶親，左丁山反問佢安倍晉三射完三箭之後，會唔會有第四箭振興日本經濟？賓架H話：「安倍先生已射完三箭，無以為繼，技窮了。以我一把年紀睇，日本必須正視移民問題，但現在冇人敢講。我已經健康不如前，最近發病，醫生吩咐我少啲飛行，多啲留在東京老家，但在家幾日，我日日照顧90幾歲阿媽，覺得好辛苦，力有所不逮，我個女嫁咗，又唔肯生住。你話日本人口老化問題係唔係好嚴重吖，老人多，後生少，勞動力嚴重不足，冇年青日本人肯做地盤勞工，安倍首相話搞奧運基建喎，邊度搵到工人呀？故此成本好貴！」然則計將安出？賓架H諗到移民先行，容許菲傭入境，學習香港，專責照顧老人與嬰兒，如此一來，可釋放大量日本婦女進入勞工市場及令佢地放膽生育，現在日本之養老院及託兒院每月收費高昂，非一般日本人可以負擔也。假若呢個計劃成功，有幾十萬至一百萬外傭入境，日本可以有時間唞一陣氣先。賓架H去過菲律賓幾次探討菲傭薪資，得到嘅答覆係500美元一個月，就有好多菲傭願意去日本，日本家庭負擔得起啫，但與政府一講，政治上有好多避忌，日本政府為免被抨擊剝削外勞，有提議向菲傭付出日本最低工資，時薪計算，咁樣就只有大富之家先至請得起菲傭，講出嚟都俾人鬧。賓架H仲未肯放棄此議，佢話，香港居住環境與市民收入與日本好相似，冇理由香港可以享受到菲傭服務，而日本唔得㗎。