特首梁振英升級咗做國家領導人之後，真係頻頻去內地訪問，今年2月底先去完廣東省，同省委書記胡春華傾粵港合作，唔夠兩個月，梁特又會喺本月19至21日，率領司局長同行會成員，去粵港澳大灣區6個城市考察，又同廣東省領導會面，即係又去拜會胡春華！
今次訪問團成員幾乎包括半個特區政府，除咗政務司司長張建宗同財政司司長陳茂波外，仲有政制及內地事務局局長譚志源、環境局局長黃錦星、創新及科技局局長楊偉雄、發展局局長馬紹祥等6個政策局正、副局長，隨團仲有行會成員同經濟發展委員會、策略發展委員會委員，難怪有政界人揶揄，梁特見立會、市民都冇咁密，不如提早唔做特首、全職做政協副主席算！