本港首次有球迷到北韓撐港足！聽日（周日）香港女足會喺北韓繼續打亞洲盃外圍賽，今次到南韓對香港，本港有球迷撐港隊撐到入北韓首都平壤，仲準備埋banner去支持㖭！原來係搞開北韓旅行團嘅GLO Travel，搞咗個參加平壤馬拉松嘅80人旅行團，之後發現日子撞正港足比賽，同北韓方面交涉咗3星期，終於肯畀團友入場支持港隊，完成首次有大班香港球迷走入北韓主場撐港隊嘅情況！
朝早跑馬拉松 夜晚睇波
領隊陳成軍話，團友會喺朝早跑完馬拉松後，夜晚就入場觀賽，現時估計大約有60人會去打氣。咁金日成競技場一張飛要幾錢呢？原來係大約250蚊人民幣。fb專頁「馬拉松 看世界」網主阿陽，仲準備埋banner去支持，佢話跑步可以年年去，但去平壤撐港隊，真係有今生冇來世！