呢幾日濕度達到百分之一百，雖然阿媽教落，朝朝起身都要有手尾摺好張被，尤其係回南天，等焗咗成晚嘅床單透吓氣，但最近就有朋友爭拗回南天唔應該摺被，究意邊個先啱？
回南天被竇最易出現蟎蟲，蟎蟲以人體新陳化謝嘅皮屑做食物，鍾意潮濕嘅環境，大家日訓夜訓嘅床舖就係佢哋嘅安樂窩，不過體積太細大家見唔到咁解。蟎蟲雖然唔會咬人，但就會引起過敏反應，好似鼻感敏、眼乾咁。
觀林蟲害負責人Henry同費清講，雖然夜晚瞓覺會出汗令被舖有濕氣，但比起近排相對濕度去到90幾100%嘅潮濕空氣，絕對係小巫見大巫。佢教路如果唔想蟎蟲趁回南天大爆發，起身之後最好保持張被攤開，千祈唔好懶整齊咁摺起佢，因為外面濕氣就會走入被竇，加速蟎蟲繁殖速度。
唔係得一個人咁講架，英國Kingston University嘅Dr. Stephen Pretlove早年都做過研究，話唔摺被可以令被舖嘅汗水更容易被陽光同空氣蒸發，等積聚嘅蟎蟲脫水而死；相反摺被反而會令濕氣更加聚集，蟎蟲自然繁殖得更快。
Henry話只要相對濕度喺60%以下蟎蟲已經唔活躍，最好趁好天嘅時候曬吓張被，又或者用一啲除蟎機吸走蟎蟲，亦要定時更換床舖。
嗱，下次再畀屋企人鬧唔摺被嘅，記得大大聲反擊啦。
費清＃要生計，也要生活＃毋忘初衷