教育局局長吳克儉出名嘅，除咗佢每月讀30本書嘅卓越才能，睇怕用公帑外訪，佢都算係專家。
話說吳得掂上年度外訪足足17次，使咗納稅人差唔多70萬港紙。噚日佢出席立法會財委會特別會議，議員自然趁機叫佢分享吓，外訪學到咩返嚟啦！
吳得掂就用去大陸南京做例子，講到南京呢個地方呢，學習中國歷史有幾咁獨特，個城市唔只喺中國唔同朝代都做過首都，就連香港都係因為《南京條約》割讓畀英國，學生去嗰度可以親身感受古都歷史，隨行嘅佢都明白咗學生學習中國歷史有咩困難。
3人訪秘魯美國 機票36萬
局長嘅神回應，自然引起全場笑爆。公民黨陳淑莊提醒局長「梗係唔記得咗仲有南京大屠殺」，仲問吳得掂去北京，會唔會睇埋中共六四屠城相關地點。
陳淑莊亦都幫局長計計數，因為佢自己早排去秘魯同阿根廷玩，全程坐商務客位，機票明明唔使10萬咁多，好奇怪局長帶兩個下屬去秘魯同美國開會，點解3個人買機票都買咗36萬港紙。
吳得掂就死撐外訪係跟足政府程序，仲話每次外訪都經過前上司政務司司長林鄭月娥審批。一班議員睇見局長識得去旅行去到咁盡，忍唔住幫局長做定人生規劃，建議旅遊業界搵佢做生招牌，或者下屆政府都諗諗搵佢做旅遊事務專員啦。
李八方