嚟到流感季節，大家都關心公立醫院係咪能夠處理大量呼吸道疾病個案，但預防永遠勝於治療。有成4,000幾架巴士嘅九巴公司，每日都有270幾萬人次搭，分分鐘成為細菌溫床。聽聞佢哋最近搵咗班大使幫手，誓要滅絕巴士上一切病菌喎！
料日抹2,000架
八方噚日遇到九巴商務總監唐東明，佢話班大使其實係一班有心嘅九巴員工同佢哋嘅親朋戚友，組成咗隊110人左右嘅「抗流感清潔大使」，由今個月1號開始，每日嘅清晨、傍晚兩個繁忙時段，喺全港50個巴士總站滅菌。呢班大使喺車長休息期間出動，用1:99稀釋清潔劑抹淨座椅及扶手，確保巴士喺每一程車開始前，細菌同病毒量都係最低。
唐生話，呢班大使會喺美孚、元朗西、尖沙嘴碼頭、沙田新城市廣場等50個巴士總站服務，預料每日清潔到一半、即係2,000架巴士，如果成效好，會推展至所有九巴總站，至於使咗幾多錢？佢只係話「大約六位數字」囉。