連格續約了！Huh乜連格唔係啱啱先俾領隊摩連奴開名批評咩？其實有邊個魔兵冇俾摩佬crit過吖，呢位24歲翼鋒周四同曼聯簽下一紙周薪高達10萬鎊（約97萬港元）嘅4年合約，將會留隊去到2021年夏天，薪酬比起原本仲有一年就屆滿嘅3萬鎊周薪合約勁升超過兩倍！連格就話：「曼聯一直係我人生中重要一部份。我自7歲起就效力呢間球會，每次着起曼聯球衣都感到無比自豪。」不過，連格想袋百萬周薪，首先要幫球隊躋身來屆歐聯，否則佢得番基本周薪7.5萬鎊（約73萬港元）咋！
雖然連格今季喺各項賽事上陣29場入5球，入球率確實唔高，但佢今季先後喺社區盾同英聯盃決賽入波，計埋上季喺英足盃決賽成為絕殺功臣，絕對係「幸運魔童」！摩連奴喺大喜日子都不吝讚番兩句：「連格擁有智慧、活力同技術，令佢成為擁有偉大前程嘅球員，佢亦係陣中備受歡迎嘅一員，我好高興佢續咗新約。」