俗語話「多做多錯，唔做唔錯」，呢句說話用嚟形容恒地副主席李家誠同香港研究協會總幹事麥燕薇，就最適合不過。皆因根據民政事務局日前回覆立法會議員書面質詢，兩人喺去年度4次青年事務委員會會議嘅出席率係「零」，一次都冇蒲過頭，但最弔詭係新一屆委員名單入面居然仲見到佢哋嘅大名。
公民黨陳淑莊噚日喺立法會財委會特別會議度，就質問民政事務局局長劉江華呢個任命安排，「係咪佢哋唔想出席？定係你可以同佢哋神交表達意見？」
劉江華回應，委員會成員過往出席率都達到八成嘅，但承認個別人士出席率唔理想，會個別處理咁話，換屆時考慮不再「取用」。佢強調政府希望委員會嘅組成嚟自不同年齡分佈，希望所有委員都能夠喺出席方面表現理想啲。