梁美芬當年殺入政壇，靠滅鼠議題起家，「鼠王芬」非浪得虛名，今日講起啲鼠輩，大家都即時聯想到佢。同樣係九西立法會議員，人稱元秋嘅民建聯蔣麗芸可能覬覦鼠王之名多時，噚日立法會特別財委會，食物安全及環境衞生一節中向政府獻計，話漁護署年年人道毀滅咁多流浪貓狗，點解唔徵集啲貓去鼠患嚴重地方嘅後巷「監察吓」。難得食物及衞生局局長高永文聽完唔笑，仲好認真咁話要論證吓派啲貓出去滅鼠係咪有成效喎。
梁美芬喺會上追問政府滅鼠工作，相信大家都唔會意外，佢話政府向美國專家研究滅鼠，但過去幾年問題越嚟越嚴重，「外國天氣同香港天氣、濕度有唔同，會唔會同內地廣東呢方面研究？」捉老鼠都要「政治正確」，拒絕外國勢力干預，八方不得不佩服。
誰不知元秋發言搶晒風頭，佢話香港有800萬人口，老鼠數目可能有8,000萬，叫政府非常時期用特別方法，搞個18區滅鼠大行動，鬥捉得多老鼠。
自爆用石仔掟老鼠
佢仲自爆曾經用石仔掟老鼠，嚇到老鼠四散喎。之後仲話政府唔好人道毀滅捉到嘅流浪貓，將呢啲喵星人派去後巷監察老鼠出沒，高永文咁樣回應：「派啲貓或者培訓啲貓去滅鼠係成立，要論證吓。」唔隨便人道毀滅動物方向當然正確啦，之但係八方唔知元秋點樣招募喵星人去特定地點「返工」呢﹖
李八方