蘋果日報報導民建聯立法會議員柯創盛嘅大學學位受質疑，柯議員到上星期還未能拿出學位證書以釋疑慮，佢話已交由律師代辦手續申領咯喎！
如黃興桂話齋，射十二碼只有兩個結果，一係入，一係唔入，補領學位證書，點解要搞咁耐呀？只有當事人先可以解釋。碰啱在中大校友賽馬日碰到一位中學老師，人地講馬睇馬，佢就吃完自助餐之後一味改卷，原來佢並非林鄭月娥，愛周末上班之人，而係要遷就老公鍾意跑馬，帶埋啲學生習作嚟馬場陪老公，坐在馬場近五個鐘頭，用番一半時間嚟做嘢都好吖；如果他日林鄭特首向工聯會還債，設立標準工時的話，呢位老師啲工作時間唔知點計。
與老師講起，佢有意申請另一份工，誰知填報學歷時，人地要檢驗學位證書正本（唔通吸取咗柯創盛式例子？）佢返屋企一搵，暈得一陣，三年前港大博士學位證書就即刻搵到，但港大學士學位證書與澳洲大學碩士學位證書就遍尋不獲，回娘家翻尋，亦不見證書蹤影，照計港大博士學位證書可以頂住晒啦，唔通港大會收一個無學士學位嘅學生讀博士咩？但僱主堅持只睇學士證書，唯有向港大補領，港大話唔該你先去警署報案遺失，有報案紙先至可以向港大申請補領，澳洲大學電郵回覆話：「請你去一間律師樓搵律師，在律師面前簽名申請補領。」
老師唯有去完警局再上律師樓，忙碌咗一日，但正確程序如此，亦無可奈何也。講起學位證書，藝術B亦有嘢講，佢本在大專水平／自資課程教學位課程，但因為競爭劇烈，自資院校生來源減少，上頭囑咐藝術B教書之外，亦要做吓「推廣」工作，即係幫手搵學生啫，藝術B乃係創作人，講藝術教油畫就叻，叫佢去搵學生嚟上課，即係拉客，非佢之所長也，自己去搵客，咪要遷就晒啲客人？藝術B於是辭職，自降一級去中學教藝術，學校即刻請咗佢，但要佢自費申請評審資歷，碩士及其他展覽經驗不計，只計學士嘅嘢，藝術B在美國讀BFA及MFA，其BFA學位必須被評為與港大中大等大學等同（equivalent），可見得教育局要求係本土主義！因為中學薪酬等級皆按照學士學位而訂，故此碩士博士學位可以不理，讀完博士唔等於可以做到或者升上去做學位教師（graduate master），此乃香港教育局之教師編制特點，咁唔讀碩士博士咪算囉，哈，又唔得噃，少個碩士學位都冇學校請你呀！藝術B與太太在津中教書多年，佢學校嘅教學助理（Teaching Assistant）已有兩個碩士學位，還在等緊空缺，唔怪得做教書呢行，好多時係有喪氣冇士氣。