美圖（1357）蝕住上市，過山車都唔知玩過幾多次，至於公司盈利前景，好多人覺得信則有，不信則無，但原來小牛金服行政總裁連敬涵（Kingston）係忠實粉絲，被行家爆響口，話佢賺好多啊！
睇好變下一隻騰訊
Kingston好大方咁話，一直都睇好美圖，或者會成為下一隻股王騰訊（700），所以由新股開始（上市價8.5元）認購，10蚊左右增持過，拉勻當第一批成本價係9蚊，美圖升到18蚊高位時，Kingston就沽些少「袋住先」，已經賺咗個Double！同所有人一樣，望住美圖高位回落到12至15蚊左右，就再加注。咁即係前後賺咗幾多？Kingston笑笑口咁推，唔敢話賺好多，但佢都唔識計喎。
有股評人話自己冇買美圖，唔信人哋個故仔喎，「撞入去嗰啲唔止要講個『信』字、仲要心口掛個『勇』字！」Kingston就冇理咁多，佢本身研究開手機、科網股，熟行熟路，又見過董事長蔡文勝，睇好美圖雖然𠵱家未有盈利，但只要用戶人數夠多，終有日會好似facebook、騰訊咁龍穿鳳㗎。
都係嗰句，信則有，不信則無，原來𠵱家買股要賺，已經變左好似撞鬼咁樣……