葡萄牙球星基斯坦奴朗拿度（C朗）有齊人魚線同六嚿腹肌就係人都知，因為佢周不時都會把握機會騷肌嘛！不過，C朗呢身完美body除咗自己努力之外，背後都有幕後推手幫一把，就係英國健身女教練莎曼花基頓（Samantha Clayton）啦！
C朗兩星期前喺社交網站靜靜雞上載咗一張佢同莎曼花齊齊跑步嘅相，但張相影到莎曼花鬼死咁細粒，搞到唔少人走漏眼，全靠八卦成性嘅英國傳媒幫大家起佢底，原來莎曼花2000年代表過英國出戰悉尼奧運4x100米接力同200米短跑，雖然成績麻麻，200米得21名無緣準決賽，接力亦僅憑第9入唔到決賽，當時仲係叫本名莎曼花戴維斯（Samantha Davies）。不過，37歲嘅佢目前跟咗前MLB三藩市巨人隊球員萊斯基頓（Royce Clayton）姓，兼且係四子之母，身材依然「弗」爆仲有年輕時都冇咁勁嘅驕人上圍成為「網紅」，各位男男女女睇完佢嘅健身片段，係咪即刻急不及待想操多兩課先？