「老婦人仲有生命！」（There's life in the old lady yet）邊個係「老婦人」？係咪講緊意甲班霸祖雲達斯個花名？喺社交網站出呢個hashtag嘅係阿仙奴中場奧斯爾，因為佢喺周三英超倫敦打吡交出一入球一助攻，協助球隊主場大勝韋斯咸3:0，兼壓過曼聯升上第5！奧斯爾賽後就喺社交網站同大家講：我哋仲未忘記點樣贏波！
阿仙奴今場有施治同奧斯賓拿齊齊受傷，要起用24歲嘅3號門將E馬天尼斯把守最後一關，同韋斯咸上半場互無紀錄。戰至58分鐘，「槌仔幫」禁區內一輪混戰後解圍不遠，奧斯爾禁區頂燙射遠柱收死戴倫蘭杜夫，喺個人為阿仙奴上陣嘅第150場射入今屆各項賽事第10球，係佢加盟4季以來首次單季錄得雙位數入球！「大眼仔」68分鐘再交出助攻，左路地波傳中畀禾確特射成2:0，加上基奧特83分鐘射入靚波，槍手最終大勝3:0，賽後29戰得54分，壓過同分嘅曼聯升上第5。相反韋斯咸錄得6場不勝兼4連敗跌落15位，領隊比歷承受更沉重壓力。