回歸廿周年，左派搞慶祝活動一浪接一浪，好似中華出入口商會連同教聯會、香港書展等搞咗個慶回歸「悅讀」嘉年華暨《悅讀，從少年起步》新書發佈會。特首梁振英太太梁唐青儀出席主禮，而另一主禮嘉賓，民政事務局副局長許曉暉就冇現身。
梁唐青儀致辭時講到活動如何培養小朋友閱讀、寫作習慣，同時加深對認識香港回歸嘅意義同對《基本法》嘅認識喎，主持完儀式後就急急腳入咗後台。中出秘書長陳勁同八方講，原來《港人講地》約咗梁太做訪問。《港人講地》係梁粉集中營，要同梁太做訪問梗係冇難度啦，至於在場其他傳媒就只等到梁太匆匆上車離場呢一幕咋。