近年唔少上市公司拍廣告，管理層都好興粉墨登場，好似葉氏化工（408）主席葉志成（Tony）自資拍攝嘅自傳電影咁，同樣搵嚟孫仔做小演員！
講緊嘅係集團太子爺、紫荊花塗料總裁葉鈞嘅囝囝，幾歲人仔就有機會上大銀幕，飾演牌匾題字師傅（吳耀漢客串）嘅孫仔。睇番啲劇照，似乎佢都唔怕望鏡頭，唔知首映禮嗰陣，又會唔會同爸爸及爺爺一齊現身呢？
講述當年打乒乓
講番套電影，其實由2015年初已經開始拍，歷時3個多月，不過就一路遲遲未上畫。葉氏化工聯席行政總裁王旭代為解釋，主要係因為內地審批需時較長，而家喺中港兩地都成功搵到發行商，預備喺5月18日一同上映喇。
套戲之所以叫做《20:16》，係講述葉志成當年參與省乒乓球比賽，由原先由20分領先，最後被對手反超前贏咗；呢場比賽令佢印象深刻之餘，亦引起佢與妹妹葉鳳娟來港創業嘅決心，集團前身「恒昌行」就係咁喺1971年出現喇！