周三NBA常規賽上演東岸大戰，刺激情況卻不似預期，賽前同得50勝27負的塞爾特人與騎士碰頭；綠軍佔主場之利卻遭逢大敗，騎士有勒邦占士（LeBron James）攻入36分下，以114:91大勝，蟬聯東岸盟主相當穩陣。
騎士今仗有內線主力T湯臣（Tristan Thompson）因扭傷手指傷缺陣，其447場連續上陣走勢亦告一段落。不過，占士貢獻36分10籃板六助攻，而路夫（Kevin Love）亦交出雙雙15分16籃板，助客軍自第二節起便拉開比數至完場。綠軍受傷兵問題影響，難以單靠攻入26分的I湯馬士（Isaiah Thomas）支撐大局。騎士贏波後除了在場數上領先塞爾特人一場，對賽成績亦取得三勝一負優勢，一旦兩隊最終常規賽戰績相同，仍能壓倒對方，以東岸一號種籽出戰季後賽；尚餘四場，形勢甚佳。
勇士成常規賽之王
同日勇士在部份主力休息下，仍在作客情況下以120:111擊敗太陽，加上另一西岸勁旅馬刺不敵湖人，勇士提早確定成為今季常規賽最佳成績球隊，在季後賽佔盡主場優勢。
文︰何西