香港人對賽馬嘅熱愛程度，可稱得上係瘋狂。事關每次賽日投注額，都講緊十億以上。
然而，相信好多馬迷對馬匹傷患知識甚微，可能會覺得啲馬一受傷就通常要人道毀滅講拜拜。其實香港千二匹現役馬，過往一年內曾經遇上骨裂，大概只有近三十匹，比例其實唔算太高。
咁大家估吓馬匹最常見傷患係咩？
A.氣管有痰或者血
B.心律不正常
C.肌腱受傷
D.關節不協調
答案就係以上四樣都係馬匹常見傷患疾病。大部分馬匹的馬蹄、筋、關節之類傷病，與運動有關。也有馬患呼吸系統毛病，如流鼻血、氣管有痰之類。當然啲馬傷咗，就會交畀馬醫院入面嘅獸醫處理。
啲馬唔識講嘢，話畀獸醫知邊度唔舒服、邊度痛，所以要小心檢查。馬醫院就有全球六十間機構先有嘅馬匹專用磁力共振檢查儀器；仲會用特別治療手法，去幫有病嘅馬仔，例如衝擊波治療同針灸。其實與人類針灸沒有大分別，都是用針刺進穴位，然後會電療，對馬匹背痛、腰痛效果特別好。
香港的馬醫院，有廿四小時候命的外科手術小組，隨時為馬匹作緊急手術。