諗住對馬德里體育會同西維爾寄予厚望，但西甲最後都係返到二龍爭珠嘅格局，其中西維爾話唔定下季會沉淪，因為佢哋嘅體育總監蒙奇即將離隊。如果邊支歐洲球壇中型班諗住大搞的話，今夏一定要將蒙奇（Monchi）搶到手。千軍易得，一將難求，而蒙奇直情係球壇名相，西維爾復興嘅諸葛亮！
受任於敗軍之際，奉命於危難之間，蒙奇當年喺球隊降落乙組時上任體育總監，將西維爾帶番上西甲。自從喺2001年升番上西甲後，西維爾就未試過跌出前10名。蒙奇最大嘅成就係將西維爾打造成歐洲盃賽勁旅，帶領球隊五次贏得歐霸盃（前稱歐協盃）冠軍！喺蒙奇之前，西維爾從未染指過歐洲賽冠軍。西維爾喺西甲穩居上游兼且稱霸歐霸盃，全靠蒙奇眼光好。
蒙奇係低買高賣嘅高手，當年50萬鎊買咗丹尼爾返嚟，之後用超過3,000萬鎊賣畀巴塞隆拿；佢用470萬鎊買入波蘭中場基祖華克，之後用2,860萬鎊賣畀巴黎聖日耳門，仲有加美路、拿傑迪錫、尼格度、干度比亞、卡路士巴卡等，蒙奇不知幫西維爾賺咗幾多錢！最勁嘅係，雖然好球員不斷被高價賣走，但西維爾嘅成績都唔會大幅下滑，因為蒙奇簽番嚟啲新血都有料到。
作為體育總監，蒙奇除咗買賣球員，仲係負責請教練，佢請教練都有眼光，好似艾馬利咁，佢教過華倫同莫斯科斯巴達等，但都教得麻麻地，但嚟到西維爾後就三奪歐霸盃。蒙奇如今走，西維爾下季仲可唔可以繼續勁呢？定係蒙奇已經好似孔明病逝五丈原之前咁，幫西維爾安排好晒接班人呢？
文：咖喱