夜場Volar母企高門集團（8412）聽日掛牌喇，相信上市儀式會星光熠熠，事關聽聞高門主要股東之一、資本策略（497）鍾楚義位千金都會出現撐場，但鍾生本人就no show，所以應該冇緣見到父女檔合照啦！
話說鍾楚義係律師出身，做刁亦非常出色，幫過電盈（008）小小超手，2003年離開電盈後買入資本策略，一開始買舊樓重建出售，𠵱家已經大隻到成為投地常客。聽聞鍾楚義本人極之低調，賣樓都唔會現真身，聽日竟然派出寶貝女做代表，加埋高門主席吳繩祖（Kester）本身嘅名門人脈，可能仲會見到其中一名上市前投資者、富商李寶椿孫女李家琦啊！
高門招股時，Kester話識得鍾生好耐，希望日後有機會喺佢旗下嘅物業開個好玩嘅Club，當然要加番一句，一切依獨立交易原則咁啦。