樂視又冇糧出？明明創辦人賈躍亭啱啱先得到融創﹙1918﹚注資168億元人仔求亡，點解又會傳出有財政問題呢？根據彭博報道，今次差啲冇糧出嘅係樂視美國嘅員工，知情人士話樂視喺大陸調動資金出現困難，所以搞到本身3月31號出嘅糧要到4月4號清明節先出到。
近排內地嚴打走資，好多公司調錢去海外都遇到問題，如果樂視今次遲出糧係受嚴打走資影響，日後難以保證美國員工可以準時出糧喎。
唔止出糧有問題，樂視舊年用20億美元收購美國電視品牌Vizio本身預計上年底完成交易，但彭博就有消息話受之前財困同嚴打走資影響，計劃隨時有變。報道話，樂視仍然想買Vizio，但可能要改為收購少數股權或者淨係同Vizio傾合作而唔係收購。