馬圈新聞無日無之，雷神莫雷拉因病今晚（5日）避戰泥地夜馬，卒之一開場就爆到七彩！第一場五班1200米泥地，主角蘇保羅馬房「金地飛客」失驚無神，在華人騎師蘇狄雄胯下後上爆冷開齋，單Win及組合獨贏A3分別派278.5及33.5元。
四歲馬「金地飛客」之前八戰零上名零獎金，還試過舊年年中出賽後，被發現氣管內有大量痰液。今次乃係本身季內首戰泥地，兼且首度由蘇狄雄執韁，11檔起步沿途墮後，近乎全程唔見影，看似無參與競賽，遲至臨尾50米，才如一陣風般吹到，於大外叠如飛殺上，一入鏡頭即冚過晒所有內側馬匹，贏短馬頭位，服役初次上名即贏馬開齋，亦成為「雙蘇」組合蘇狄雄與蘇保羅歷來首匹合作頭馬。
然而「金地飛客」馬主黃美斯和練馬師蘇保羅都不在場，拉頭馬只是馬主代表。
「金地飛客」勝出，頭場同時開出「雙飛」連贏，派彩685.5元，事關跑第二的是杜利萊座騎「飛霞」，三、四名分別為「合一」及「踏雪名駒」，四重彩派28萬幾。