這晚（5日）泥地夜賽非榜首練馬師蔡約翰強項，但他都有兩Win回饋馬迷，包括第四場由蔣嘉琦贏「五星特工」，以及第七場二班泥地1200米由潘頓勝出「翩翩」，兩駒同樣大熱掄元。當中「翩翩」完成今季五捷，今場單Win及組合獨贏A1分別派23.5及16.5元。
「翩翩」上季三歲出道兩戰兩亞，今季踏入四歲大躍進，這晚賽前五戰四冠一亞，贏馬場地有田草、谷草。呢次初跑泥地，續配潘頓出擊，雖負133頂磅但排1檔好位，依然由頭熱到尾，陣上表現亦十分瀟灑，出閘順利，沿途前置跑主動，直路一望空即自動增速脫穎而出，大勝3.25馬位，姿態相當輕鬆，並成為繼大摩馬房「海翡翠」後，季內第二匹五捷馬。
「翩翩」累積8戰5冠3亞未甩Ｑ，97分馬將升上頂班，未來勢必進軍級際賽。而此駒馬主黃言信太太出名美艷，今晚佢又盛裝到場拉頭馬，一身露膊連身短裙，大晒美腿，引來現場唔少人士駐足觀看。
第七場細冧巴天下，1號「翩翩」勝出，3號「越影」、5號「飛龍駒」及7號「心花怒放」順序跑獲二至四名，四重彩派三萬四千幾。
至於潘頓除了驘「翩翩」外，連同第二場勝出蘇偉賢馬房「特獎」，這晚暫以一對連捷馬起孖，一洗上次賽事在沙田食白果的頹風。