【本報訊】今日是免費電視台ViuTV啟播一周年。ViuTV講求創新，開台重點節目《跟住矛盾去旅行》一度成為城中熱話。一年後，ViuTV總經理魯庭暉認為，節目要吸納不同層面觀眾，製作時要「掛狗頭賣羊肉」，需要有不同的創新和傳統「糖衣」包裝，讓觀眾易入口；未來一年亦會多嘗試，期望「個餅越造越大」。
開台一年，魯庭暉頭上添上幾分銀白。他向記者表示，12年免費電視牌照就如一場馬拉松，形容過去一年表現「暫時OK，啱啱開跑，未仆係度，繼續跑緊」。ViuTV開台以「創新」行先，至今亦然，他說：「我哋發現創新係有一班觀眾，佢哋鍾意新嘢，同一時間發覺另一部份觀眾需要一啲習慣咗嘅嘢，令佢哋感覺易入口」。
他舉例指，新節目《兩面不是人》是用「傳統包裝創新」，「搵兩個100%血統嘅印度人，但未去過印度，同時又搵兩個唔係印度人，但非常熟悉印度同印度話，一齊去印度」。他稱，「都幾好笑，啲印度人以為係鄉里唔呃嗰兩個印度人，反而呃另外兩個唔係印度人」。
魯表示，當初開台行創新路沒有錯，又指不同階段亦需要創新，強調需毋忘初心去創作，否則很易被之前做過的事束縛。他又認為，現今香港電視業生態正在轉變，過往可能依靠傳統收視率作參考數據，惟現在反而關注「網上有冇noise」。
另一新節目《林雪金曲》是一個5分鐘的音樂節目，凌晨12時半播放，指由林雪主持或會吸引「啲人係想睇林雪講粗口或講嘢得意，其實又係狗頭」，希望藉此將音樂帶給更多觀眾。同時作新嘗試，晚上11時在網上提早播放節目，「簡單嚟講係digital睇快過電視機，11點幾啲人狂上網，寧願啲人睇完知道首歌，之後啲人係電視度睇到又會笑一笑……可能半年唔work又改返呢」。
他認為，ViuTV並非只是個免費電視台平台，「𠵱家有四成製作係同出面公司合作……既然我有平台有資源，希望起（成功）嘅唔只係自己製作團隊，如果嗰間公司做得幾好，不如幫佢建立一個節目系列」。他仍相信要「造大個餅」，「同多咗製作公司合作，慢慢先多節目，個場（電視業）先旺」。
對於外界關注ViuTV的收視，他表明「冇乜點理過收視」。對於與大台TVB和下月開台的新免費電視台奇妙電視競爭問題，他僅說：「各有各做啦！」
■記者張文鈴