F1中國站將會喺嚟緊禮拜日舉行，紅牛車手歷斯亞度去上海備戰之前，就決定嚟香港玩一輪先！呢位27歲嘅澳洲車手仲向世界跳繩錦標賽冠軍隊成員何柱霆偷師，學吓點樣跳繩。
歷斯亞度唔似得平治車手咸姆頓咁路過香港，呢位紅牛車手就決定搞搞新意思，喺酒店天台向何柱霆學花式跳繩，佢喺相入面嘅姿勢就攞滿分喇，唔知真係跳嗰陣係咪咁勁呢？歷斯亞度跳完繩後，仲去咗食點心醫肚，之後先出發去上海。
另外，前F1世界冠軍畢頓喺上季宣佈退役後，就轉行出戰三項鐵人比賽，呢位37歲嘅前英國車手上周六喺加州出戰三項鐵人賽，喺35至39歲嘅年齡組別以第三名衝線，原本可以得到今年較後時間舉行、三項鐵人世界錦標賽嘅參賽資格，但係畢頓好快就俾賽會取消資格（DQ），理由係佢踩單車超速喎！除咗畢頓之外，亦都有好多其他參賽者被DQ，其實賽會嘅規則講到明，踩單車時有一段路時速唔可以超過25哩，但好多人都無留意呢個規則而中伏。