仲有唔夠3個月香港就回歸廿周年，作為親中商會嘅香港中華出入口商會梗係隆重其事，搞吓啲慶回歸活動啦，唔係被鬧hea做就麻煩喇。今年佢哋大嗱嗱拎咗約800萬出嚟，頭炮就係安排香港青年去內地交流，另一壇就係借書展之便，資助1,000名中小學生買書睇。
安排港青北上交流嘅活動叫做「尋根追夢．同心同行」，主要會走訪北京、南京、上海、杭州同埋深圳，然後同當地嘅香港學生做導遊，睇吓內地風土人情，而壓軸就喺深圳前海青年夢工場舉辦論壇，其間會有攝製隊跟住拍成真人騷，然後電視台播。邊個台？梗係鳳凰衛視啦，仲使問？
至於書展個活動就叫做「我們一起悅讀的日子」，資助1,000位小四至小五同中一至中二嘅學生買書睇，當然係指定範疇嘅書啦！順帶一提，呢個活動以往教聯會都有份搞嘅，明未？