人生有幾多個10年？今年40歲嘅在囚人士阿倫（化名）因謀殺罪被判終身監禁，至今服刑14年，喺人生第4個10年，噚日喺赤柱監獄同來自8間中學、超過350位師生分享最痛嘅經歷。阿倫回憶吸毒令佢身無分文，仲打劫殺人，入獄前囡囡剛出世，但佢無法睇住囡囡成長，老婆亦提出離婚。一次錯誤決定令佢悔恨終身，被判終身監禁嗰刻覺得「人生已完」，回顧14年監禁日子，佢坦言「終身監禁最痛係無法享天倫之樂」。
若有機會同前妻同囡囡講一句心底話，阿倫話會同前妻講一句「我愛你」，希望有機會修補裂縫，亦希望聽到囡囡自願叫佢一聲爸爸。只有初中學歷嘅阿倫重拾書本，報讀公開大學嘅工商管理學士學位課程，希望將來有機會回饋社區。
律政司司長袁國強噚日都有出席呢個活動，但佢冇回應會否留任下屆政府，早前佢講過現階段都唔會答相關問題，要畀候任特首林鄭有最大空間處理。