正當候任特首林鄭月娥呢排為組班連噩夢都發埋嘅時候，盛傳冇得留低嘅商務及經濟發展局局長蘇錦樑就去咗意大利考察，而且仲冇為冇得留得而影響心情，除咗全程落力推銷香港，仲喺fb密密出po！
蘇錦樑前晚到埗就呻，自己有「密麻麻」嘅會議同活動要去，不過呢啲純文字討論，可免則免，之後就去咗參觀位於米蘭運河邊上展區、米蘭設計周最大嘅場外展覽場地，睇相已經感受到嗰度幾咁五光十色，正如蘇局長話齋「藝術感染力澎湃」。化身導遊嘅蘇局長仲去咗由舊劇院變身嘅美食廣場，嗰度仲有以香港街頭美食做主題嘅美食節，佢仲同嘉賓拎住造雞蛋仔嘅夾、近日大熱嘅懷舊暖水壺合照。
參觀電車改裝劇場
食完嘢，又要做吓正經事，先見米蘭副市長，傾吓旅遊同體育盛事方面嘅合作，跟住同倫巴第地區經濟發展部部長會面，討論香港同當地嘅經貿聯繫，之後再去睇由香港設計師設計嘅「光影」電車，流動黑盒劇場。睇完電車佢就再睇展覽，同為2017米蘭設計周香港設計展覽開幕。