今晚（5日）乃季內第四次泥地夜賽，資深華人騎師黎海榮表現毫不失禮，連同今晚第三場四班一哩勝出文家良馬房「駕喜」在內，佢於今季已舉行的四次同類賽事，其中三次有馬贏，至於「駕喜」季內首度獲勝，單Win及組合獨贏A3分別派262.5及33元。
現年六歲的「駕喜」從今場26倍賠率反映，可以話係一匹被遺忘的中班好馬，須知此駒上季尾加盟文家良馬房後，四戰全勝田草1600米，然後光榮唞暑，實力絕對有番咁上下。
今季「駕喜」一直落敗減分，卒之這晚用番之前騎過未贏過的黎海榮，遇上快步速，雖然本身以往跑泥地未叻過，但因食啱今晚利後追之形勢，直路後上如入無人之境，輕勝2.5馬位，打開季內勝門兼取得服役第六捷，文家良復蘇連續第二次賽事贏馬。
文家良說：「『駕喜』在四班有競爭力，評分已屆反彈之時，其實早前祈普敦夥拍此馬跑泥地所負不遠，所以今次再安排牠出戰泥地。今場黎海榮發揮出色，人馬表現令我滿意。牠既然首次在泥地交出頭馬，日後便多一條出路了。」
第三場冷門「駕喜」行頭，二至四名則為熱門天下，順序是「旅遊大使」、「喜得龍」及「盛勢」，其中韋達座騎「盛勢」閘前瘋狂落飛，熱到啡燈3.9倍，位置更大熱1.3倍，最終梗頸四WP齊撻，落飛黨輸到眼癱癱。