美國女高球手莉絲湯遜（Lexi Thompson）喺周日結束嘅女子首項高球大滿貫全日空錦標賽，因為俾睇緊電視直播嘅觀眾發現自己出錯兼向賽會「報寸」，令佢最後痛失冠軍！「老虎」活士等高球名將知道呢件事後，都齊齊怒插賽會，話裁判唔應該受外界影響而更改判決。
22歲嘅莉絲湯遜喺周日舉行嘅第四日賽事中，打到第12洞時仍有三桿領先優勢，形勢大好。不過，呢個時候突然有裁判走上前向佢解釋，話有觀眾透過電郵通知賽會，話喺電視睇到湯遜喺第三日打第17洞嘅果嶺上，重新擺波時將個波擺歪咗大約一吋。結果裁判翻睇相關片段後，就以擺波失誤同簽署錯誤計分卡為由各罰兩桿，總共向湯遜追罰四桿，令佢第三日嘅成績由67桿改成71桿，總成績同時變成落後一桿。
鬥至附加洞不敵韓妹
不過，曾經喺2014年贏得冠軍嘅湯遜好快就收拾心情，到第13洞打出超遠距離嘅「小鳥」，追到連同南韓球手柳簫然在內嘅三位球手並列領先。不過，湯遜打完第18洞後，以總成績低標準14桿嘅274桿同柳簫然打成平手，最後戰至附加洞輸波。柳簫然贏波就梗係開心啦，佢仲按傳統跳入水池慶祝。雖然湯遜痛失冠軍，但佢亦表現得相當有風度，賽後一日喺社交網站發表聲明，表示唔應該因為呢件事抹煞柳簫然嘅勝利，仲話：「LPGA裁判當時作出呢個裁決，我哋作為職業高球手必須接受，即使有幾痛苦。」
名宿不滿觀眾變裁判
雖然嗰位報寸嘅觀眾並冇冤枉湯遜，不過外界可以咁直接影響爭標形勢可謂史上首例，所以唔少高球選手都為湯遜抱不平，好似「老虎」就話：「喺屋企睇波嘅觀眾，唔係賽場上嘅裁判，湯遜加油！」施治莊遜指自己為湯遜感到難過，仲話呢件事完全唔合理。至於科拿喺周一大師賽練習時直言：「呢種情況絕對唔應該再發生，所有高球手都係咁諗。如果有球證時刻睇住影片，我絕對冇異議，但唔應該有任何外界電郵、電話可以聯絡裁判並影響裁決。」
