候任特首林鄭月娥嘅老公林兆波向來低調，之前好少見佢陪太太出席公開活動。八方噚日就喺ifc撞到林鄭同老公趁清明節公眾假期去ifc睇戲，睇完戲仲shopping，林鄭去咗間舖揀絲襪，仲專攻黑絲，買咗一大袋，而林兆波同大部份男士一樣，喺另一半掃貨時坐埋一邊玩電話。
喺保鑣陪同下，到中環ifc睇戲。林太睇乜戲？原來係近期熱爆嘅日本動畫《謝謝你，在世界角落中找到我》。
睇日本純愛動畫
噚日朝早9點，林鄭同先生離開時被問到揀呢套戲嘅原因，林太指指身邊嘅老公話「你問佢啦」，林兆波笑住講：「本書原作者河野史代係好出名作者，佢本漫畫畫得好好，好感動！」林太又叫記者「你去睇吓啦！」
之後林太同老公去商場其中一間售賣女性衣物嘅店舖購物，見林太專注揀絲襪，同女店員密密斟，仲專攻黑絲㖭，不時摸吓絲襪質地，其間林兆波坐喺舖入面玩住手機靜靜等，林太最後買咗幾對絲襪塞滿一袋，自己畀錢之後就繼續去買日常用品。其間有市民要求同林太合照，林太亦都有求必應，面露笑容，老公林兆波就識趣行開。