導演高志森向來在鍵盤世界十分兇狠，之前七警案時在facebook留言大鬧法官，搞到司法機構都話高度關注，仲轉介律政司跟進。點解提起佢？皆因廉署展開大規模搜捕，3日內拘捕72人涉資訊科技界種票，署方冇公佈拉咗咩人，而高導演就喺facebook發帖，當中一張圖寫住「當日有傳媒報道：教協將大量會員轉到資訊科技界，大家查查相關報道。」
教協總幹事馮家強噚日喺facebook隔空回應：「我好乖好聽佢話查咗，《頭條日報》原來一早撤回報道和致歉。」話說當時《頭條日報》報道有1,500個教育界選民轉去資訊科技界，選舉事務處之後發聲明指出報道數字有偏差，《頭條》要登聲明撤回報道兼致歉。唔知高導演係咪聞到辳味，之後急刪po，馮就問：「高志森走去學《頭條》撤回個post？定係hide咗？嗱學嘢要學全套，幾時學埋《頭條》道埋歉先？」