會德豐（020）旗下九倉（004）唔止要cut有線電視，兩間公司連董事花紅都cut！據去年年報，會德豐主席吳宗權酬金總額較前年少9%，由1,750萬元減至1,586萬元，主要由於酌情花紅減少200萬元，而其他薪酬項目輕微增加。不過，吳宗權鍾意游水呢啲唔多使錢嘅活動，平時又去吓金鐘平民餐廳，就算收少啲人工，應該都冇乜影響！
副主席吳天海就慘啲，酬金總額降幅最大，由2,295萬元減至1,957萬元，按年跌14%，其中酌情花紅減少400萬元。其餘董事梁志堅、徐耀祥、黃光耀均減花紅，薪酬總額減12%。
集團旗下九倉董事會早前同樣實施減薪。年報顯示，除董事凌緣庭、陳國邦酬金總額增加外，大部份董事均收取較少花紅，周安橋同李玉芳酬金分別減11%及13%。