牙買加飛人保特一早講明，玩埋今年八月喺英國倫敦舉行嘅世界田徑錦標賽就會退役，令唔少田徑迷都好心急想幫佢搵番個接班人。近日，牙買加就有個12歲少女莉絲頓（Brianna Lyston）橫空出世，令唔少人都希望佢可以成為「女閃電」！
上周末舉行嘅牙買加少年田徑錦標賽，莉絲頓先喺女子100米跑以11秒86稱后，到咗200米就贏得更誇張，以破紀錄嘅23秒72率先衝線。比起同胞伊蓮湯遜喺里約奧運奪冠嘅成績21秒78，莉絲頓只係跑慢不足兩秒，假如佢可以一直進步嘅話，要打破美國名將姬菲芙喺1988年奧運創下嘅21秒34世績並非天方夜譚！
200米跑慢奧運冠軍兩秒
值得留意嘅係，莉絲頓喺2015年到千里達出戰加勒比海教師聯會田徑賽時，就喺300米跑出42秒21，比起同樣係10歲嘅男仔快大約一秒！唔知大家喺2020年東京奧運，有冇機會見到呢位「女閃電」代表牙買加出賽呢？