離開議會後嘅民建聯鍾樹根雖然少咗曝光，但依然咁出眾。早幾日係樹根60大壽，八方喺度送上遲來嘅祝賀！為慶祝自己「登六」，樹根噚日就去咗捐血，好有意義喎！
樹根仲同八方講，登六第一個好處就係坐城巴有半價。話說佢牛一嗰日搭巴士，一嘟八達通就發現自己享受咗60至64歲嘅半價優惠，知道自己被列為長者嗰吓都幾百感交集。除咗城巴送生日禮物畀樹根外，根嫂亦好識做，送咗粒玉墜畀根哥。
話時話，政圈有人思疑樹根會喺立法會補選重出江湖，佢就笑笑口話「第二個區喎﹗冇謂搞人哋啲區啦！」咁如果係港區呢？佢就話「未有打算喎」。