【第36屆香港電影金像獎】應屆金馬獎最佳女配角金燕玲，憑同一部電影《一念無明》角逐今屆香港電影金像獎最佳女配角。現年62歲嘅金姐曾有疑問，《一》片嘅導演黃進同編劇陳楚珩兩位30歲都唔夠，到底有過乜嘢嘅經歷，金姐話：「我冇懷疑佢得唔得，但我冇諗過呢個導演係咪真係好勁，我亦唔會因為攞過幾次就唔想攞！如果可以攞到就發達啦，未試過一部戲，同時攞咗金像同金馬。」
憶亡父往事
金姐飾演余文樂母親，有一幕樂仔幫佢洗身，勾起金姐當日幫父親清潔嘅往事，佢話：「我爸爸都係病死嘅，佢最後嘅時間，有一日喺病床失禁。我係大女，要幫爸爸清洗，佢對我講咗句，就係對唔住。」陳楚珩坦言構思角色時，腦海第一時間諗起金姐：「天台嗰場戲，你摸啲植物，其實我喺後面喊緊，你完全演繹到角色背負住嘅嘢。」
看似一齣完全冇出路嘅戲，同香港嘅困局有啲類似，但導演同編劇其實想表達出一種「認清現實嘅積極」，而唔係一味迴避問題。黃進話：「或者想像多啲，呢個城市其實我哋可以做到啲乜嘢，入面有好多問題，我哋可以行多一步。」就正如金姐嘅人生，當年由外國返香港，無親無故，都係靠自己一步步爬出今天嘅成績，金姐話：「62歲人，原來都會有彩虹發生嘅時候，我希望大家都唔好放棄。」
撰文：馮仁昭
場地提供：OVO Cafe
化妝：Stephen Lau@StephenMakeup
髮型：Eric Tse@Headquarters Limited
