𠵱家做地區工作「蛇齋餅糭」已經out，提居民打風收衫、閂窗更加係基本功，做咁多嘢至多令你唔跌票咋。要同居民打好關係，香港一日遊兼食海鮮冇咩新意，所以近年越來越多區議員撈埋旅行社嗰瓣，帶街坊團衝出香港。好似公民黨油尖旺區議員余德寶上星期就同一班街坊去咗台灣阿里山，例牌動作梗係着番套原住民衫合照啦，佢仲「犧牲色相」同男街坊玉帛相見，齊齊浸溫泉㖭。
宣誓風波令梁頌恆、游蕙禎失去議席，如果佢哋最終敗訴，相信新界東同九龍西補選最快年尾舉行，各黨派已經磨拳擦掌準備出戰。余德寶同八方講，有街坊浸浸吓溫泉問佢會唔會參加補選，仲話好支持佢，至於佢點回應呢？八方就不得而知喇。