無論係區議會選舉、立法會選舉，甚至前排先完結嘅特首選舉中，各路候選人都將加強同年輕人溝通掛喺嘴邊，適逢就快係六四事件28周年，支聯會決定由今個月中開始，推出全新、由年輕人主持嘅網台節目《薪火相傳》，嘗試從青年角度出發講六四。
支聯會即將推出嘅網台節目《薪火相傳》，搵咗3位80、90後嘅青年人做主持，分別係過去幾年做六四燭光集會司儀嘅Ben林兆彬、支聯會副主席鄒幸彤，同埋支聯會年輕常委葉偉強。至於節目內容就包括訪問支聯會資深常委同義工，例如李卓人、何俊仁、張文光、尹兆堅、黃志強等。
與此同時，支聯會網台仲有一個節目叫《細說中南海》，係由何俊仁同埋律師劉國興主持。呢個節目當然唔單止係特別畀青年啦，不過相信都有唔少可觀性。大家有興趣就記得抄低以下網址， https://bit.ly/hkanetradio ，咁月中又多個途徑關心六四事件。